Գոհություն

Գոհություն

Ներածություն

Ամեն առավոտ նա հանդիպում էր մաշված վերարկուով ծանրամարմին, միջին տարիքի մի կնոջ, ով մանրադրամ էր մուրում հին աղյուսաշեն եկեղեցու մուտքի մոտ։ Նա ժպտալով ողջունում էր բոլորին և սիրալիր կերպով «Բարի լույս» ասում։ Փեմը գրեթե միշտ ինչ-որ բան էր տալիս նրան։ Այդպես շարունակվեց գրեթե մեկ տարի, բայց մեկ օր մաշված վերարկուով կինն անհայտացավ։ Փեմը մտածում էր, թե ի՛նչ կարող էր պատահել նրան։ Եվ մի գեղեցիկ օր նա կրկին կանգնած էր եկեղեցու մուտքի մոտ՝ նույն մաշված վերարկուով։ Երբ Փեմը վերցրեց դրամապանակը՝ իր սովորական նվիրատվությունն անելու համար, այդ կինը կանգնեցրեց նրան. «Շնորհակալություն, որ օգնում էիք ինձ այդ օրերի ընթացքում», – ասաց նա, – «Դուք այլևս չեք տեսնի ինձ այստեղ, որովհետև ես աշխատանք եմ գտել»։ Ասելով դա՝ նա մի փաթեթ մեկնեց Փեմին։ Նա կանգնած էր իր հին տեղում և սպասում էր, բայց ոչ թե փողի, այլ իրեն ծանոթ մարդկանց՝ ամեն մեկին մի փքաբլիթ հյուրասիրելու համար։

Նա գոհացող էր։

(Ղուկաս 17:11-19)

Եւ եղաւ՝ երբոր նա  Երուսաղէմ էր գնում, ինքը Սամարիայի եւ Գալիլեայի միջովն էր անցնում։  12  Եւ նա մի գիւղ մտնելիս, տասը բորոտ մարդիկ պատահեցան նորան,  որ հեռուանց կանգնեցին,  13  Եւ իրանց ձայնը բարձրացրին եւ ասեցին. Յիսուս՝ Վարդապետ, մեզ, ողորմիր։  14  Եւ երբոր տեսաւ՝ ասեց նորանց.  Գնացէք ձեր անձերը քահանաներին ցոյց տուէք. եւ եղաւ, որ նորանք գնալիս՝ սրբուեցան։  15  Եւ նորանցից մէկն, երբոր տեսաւ թէ բժշկուեցաւ, ետ դառաւ՝ բարձր ձայնով փառաւորում էր Աստուծուն։  16  Եւ իր երեսի վերայ ընկաւ նորա ոտների առաջին, եւ գոհանում էր նորանից. եւ ինքը Սամարացի էր։  17  Յիսուսն էլ պատասխանեց եւ ասեց. Չէ՞ որ տասն էլ սրբուեցան. ապա այն ինն ո՞ւր են։  18  Ետ դառնողներ չ’գտնուեցան, որ Աստուծուն փառք տան, բացի այս այլազգին։  19   Եւ ասեց նորան. Վեր կաց՝ գնա. քո հաւատքն ապրեցրեց քեզ։

1. Շնորհակալ եղեք նույնիսկ դժվարին հանգամանքներում

Այս տեսակի գոհացող վերաբերմունքը՝ հավատք է։

Մի՞թե մենք կարող ենք սրանից ավելի համոզիչ դաս ստանալ այս Գոհության շաբաթվա ընթացքում։ Դուք չեք կարող սպասել, որ խնդիրները վերջանան, որպեսզի սկսեք հավատքով ապրել։ Դուք չեք կարող պայմաններ թելադրել Սուրբ Աստծուն։ Դուք չեք կարող ասել. «Տե՛ր, երբ բավականաչափ փող ունենամ, ես կկատարեմ Քո հանձնարարությունները»։ Դուք չեք կարող աղոթել. «Տե՛ր, եթե Դու պարզապես լուծես այս հարցն իմ ընտանիքում, ես կսկսեմ եկեղեցի հաճախել»։ Դուք չե՛ք կարող պայմաններ թելադրել Աստծուն։ Ընդհակառակը՝ Աստված Ինքն է պայմաններ թելադրում մեզ. Նա պահանջում է, որ մենք հավատանք, մինչև որ փոփոխություններ տեղի ունենան։

Հովիվ Ջեկ Հինտոնը՝ Հյուսիսային Կարոլինա նահանգի Նյու Բերն բնակավայրից, երկրպագության ծառայություն էր առաջնորդում Տաբանգո կղզում գտնվող բորոտների գաղութում 1996 թվականին։ Երբ վերջին երգի ժամանակն էր, նա հարցրեց, թե արդյո՞ք ինչ-որ մեկը ցանկանում է որևէ երգ առաջարկել։ Մի կին, ում դեմքը չէր երևում ամբիոնի կողմից, շրջվեց։

«Դա ամենասոսկալի դեմքն էր, որը ես երբևէ տեսել էի», – հիշում էր Հինտոնը։ – Այդ կինն ընդհանրապես չուներ քիթ և ականջներ։ Հիվանդությունը զրկել էր նրան նաև շուրթերից։ Նա բարձրացրեց իր առանց մատների ձեռքը և խնդրեց. «Կարո՞ղ ենք երգել «Հաշվի՛ր քո բազում օրհնությունները երգը»։

Չկարողանալով զսպել զգացմունքները՝ Հինտոնը հեռացավ ծառայության վայրից։ Նրան հետևեց թիմի անդամներից մեկը։ Ի վերջո, նա ասաց. «Ջե՛կ, կարծում եմ՝ դու այլևս չես կարողանա երգել այդ երգը»։ «Ո՛չ, կկարողանամ», – պատասխանեց Ջեկը, – «բայց ես այլևս չեմ երգի այն առաջվա պես»։

2. Շնորհակալ եղեք, երբ տեսնում եք Աստծո բարությունը

Այս տեսակի գոհացող վերաբերմունքը՝ երկրպագություն է։

Բժշկված բորոտներից միայն մեկը վերադարձավ Հիսուսի մոտ՝ փառաբանելով Աստծուն։ Նա շնորհակալ էր։ Նա արտահայտեց մարդկանց առջև այն, ինչ իր ներսում էր։ Նա բարձրաձայն գոհանում էր և բոլորովին չէր ամաչում։

Ինչո՞ւ էր նա բարձրաձայն գոհություն հայտնում։ Նա մշտապես ստիպված էր գոչել, երբ բորոտ էր։ Հավանաբար, տարիներ շարունակ նա այդպես էր վարվել։ Նա, երևի, այնքա՜ն էր գոչել, որ չգիտեր էլ, թե ինչպե՛ս մոտենար Տիրոջը լռությամբ, կամ նույնիսկ սովորական ձայնով։ Վերադառնալով և ընկնելով Հիսուսի ոտքերի մոտ՝ նա փառաբանում էր Աստծուն սովորականից ավելի բարձր ձայնով։

Ահա և զարմանալիորեն հակիրճ գործնական առաջադրանք։ Անպայման ժամանա՛կ հատկացրեք այս շաբաթ, որպեսզի գոհանաք Աստծուց Նրա բարության համար։ Իրական գոհությո՛ւն մատուցեք Նրան։ Անպայման հավաքե՛ք ձեր ողջ ընտանիքը՝ Գոհության աղոթքի համար, և իսկապես գոհության աղո՛թք մատուցեք։ Բաց մի՛ թողեք Աստծուն երկրպագելու հնարավորությունն այս շաբաթ։ Եվ բարձրաձա՜յն արեք դա։

3. Թող որ ձեր գոհությունը վերածվի գործողության

Բժշկված բորոտներից միայն մեկը վերադարձավ։

«Որտե՞ղ են մնացած ինը», – հարցրեց Հիսուսը։

Դուք հասկանո՞ւմ եք, թե ի՛նչ է սա նշանակում։ Հիսուսն ասել էր. «Գնացե՛ք և ցո՛ւյց տվեք ձեզ քահանաներին»։ Հիսուսը չէր պատվիրել նրանցից ոչ ոքի գոհանալ Աստծուց կամ վերադառնալ Իր՝ նրանց Բժիշկի մոտ։

Այնուամենայնիվ, Հիսուսն ակնկալում էր, որ նրանք անեին դա։

Ի՞նչ է Հիսուսը սպասում ձեզանից։ Արդյո՞ք Աստծո Սուրբ Հոգին դրդում է ձեզ ինչ-որ քայլեր ձեռնարկել։ Արդյո՞ք Տերը դրդում է ձեզ հավատքի քայլ անել։ Կա՞ արդյոք մի ընտանիք, ընկեր, կամ նույնիսկ անծանոթ մարդ, ով օգնության կարիք ունի այս տարվա Գոհության տոների ժամանակ։ Կա՞ այնպիսի բան, ինչը, ձեր համոզմամբ, դուք պետք է անեք։

4. Գոհությունն ապրեցնում է

Կրկին կարդացեք այս աստվածաշնչյան հատվածը և հետևեք ինձ։ Մենք դիտարկելու ենք երեք բառ, որոնք հաղորդում են նույն իմաստը։ Երեքն էլ ցույց են տալիս, թե ինչպես Հիսուսն ապրեցրեց այս նախկին բորոտին։

15  Եւ նորանցից մէկն, երբոր տեսաւ թէ բժշկուեցաւ, ետ դառաւ՝ բարձր ձայնով փառաւորում էր Աստուծուն։  17  Յիսուսն էլ պատասխանեց եւ ասեց. Չէ՞ որ տասն էլ սրբուեցան. ապա այն ինն ո՞ւր են։  18  Ետ դառնողներ չ’գտնուեցան, որ Աստուծուն փառք տան, բացի այս այլազգին։  19   Եւ ասեց նորան. Վեր կաց՝ գնա. քո հաւատքն ապրեցրեց քեզ։

Սկզբում կարդացեք խոսք 15-ը. «Եվ նրանցից մեկը, երբ որ տեսավ, թե բժշկվեց…»

Կարդացեք խոսք 17-ը. Հիսուսը հարցրեց. «Չէ՞ որ տասն էլ սրբվեցին»։

Իսկ այժմ,  կարդացեք ևս մեկ խոսք։ Խոսք 19-ում Հիսուսն ասում է այս գոհացող մարդուն. «Վե՛ր կաց, գնա՛, քո հավատքն ապրեցրեց քեզ»։

«Ապրեցրեց» բառը «սոզո»-ն է, որը նշանակում է՝ «փրկել»։ Հույներն օգտագործում էին այն, երբ մարդիկ ազատվում էին վտանգավոր իրավիճակներից։ Օրինակ՝ նրանք օգտագործում էին «սոզո» բառը, երբ նավաստիները փրկվում էին ծովային փոթորկից։ Մատթեոսը սկսեց իր Ավետարանը՝ պատմելով Սուրբ ծննդյան մասին։ Հրեշտակը պատվիրեց Հովսեփին անվանել Մանկանը «Հիսուս», որովհետև այդ անունը նշանակում էր, որ Նա «փրկելու էր մարդկանց իրենց մեղքերից»։ Նա «սոզո» էր անելու մարդկանց։

Նկարագրելով, թե ի՛նչ է լինելու այն մարդու կյանքում, ով դավանում է Հիսուսին մարդկանց առջև որպես Տեր և Փրկիչ՝ Պողոսն օգտագործեց նույն բառը.

Որովհետև եթե բերանովդ Հիսուսին Տեր դավանես, և սրտումդ հավատաս, թե Աստված հարություն տվեց Նրան մեռելներից, կապրես («սոզո»)։ Քանզի սրտով հավատում ենք արդարանալու համար, և բերանով դավանում ենք փրկվելու («սոզո») համար (Հռոմեացիների 10։9-10)։ 

Հիսուսն ասաց այս գոհացող մարդուն, ով ցանկանում էր հետևել Աստծուն մինչև իր  հանգամանքների փոխվելը, և երկրպագել Աստծուն մինչև տուն վերադառնալը… Հիսուսը հռչակեց լիարժեք բժշկություն և կյանք ավելիով։ Հիսուսն ասաց, որ այս մարդն ինչ-որ բան էր հասկանում։ Իսկ դուք հասկանո՞ւմ եք։

Ամփոփում

Մատթեոս 8:1-4-ը

Մատ. 8:1-4 – Եւ երբոր սարիցն իջաւ, շատ ժողովուրդներ գնացին նորա ետեւիցը։  2  Եւ  ահա մի բորոտ գալով երկրպագում էր նորան եւ ասում. Տէ՛ր, թէ որ կամենաս, կարող ես ինձ սրբել։  3  Եւ Յիսուսը ձեռքը մեկնելով նորան դիպաւ եւ ասեց. Կամենում եմ՝ սրբուիր. եւ նորա բորոտութիւնը շուտով սրբուեցաւ։  4  Եւ Յիսուսն ասեց նորան.  Զգոյշ կաց՝ ոչ ոքի չասես, այլ գնա քեզ ցոյց տուր քահանային եւ  Մովսէսից հրամայուած ընծան մատուցրու, նորանց վկայութիւն լինելու համար։ 

Մի բորոտ մոտեցավ Հիսուսին՝ կանգ առնելով պահանջվող հեռավորության վրա։ Նա ծնկի իջավ Հիսուսի առջև՝ օգնություն խնդրելով։ Նրա տեսքն անգամ վանող էր։

Մատթեոսը գրում է, որ Հիսուսը պարզեց Իր ձեռքը և հպվեց այդ մարդուն։

Նա գրում է, որ Հիսուսն ասաց. «…Սրբվի՛ր… գնա՛, քեզ ցո՛ւյց տուր քահանային»։